നവവത്സരാശംസകള്‍

പുതുവത്സരാശംസകള്‍

കലണ്ടര്‍ വിശേഷങ്ങള്‍

    

  സാമൂഹിക, സാമ്പത്തിക, മതപര, ഭരണ ആവശ്യങ്ങൾക്കായി ഒരു നിശ്ചിതകാലയളവിലെ ദിവസങ്ങളെ അവയുടെ ആവർത്തനപ്രത്യേകതകളോടെ ക്രമീകരിച്ച് മനുഷ്യജീവിതം ചിട്ടപ്പെടുത്തുന്നതിനുള്ള ഒരു സം‌വിധാനമാണ് കലണ്ടർ. ഈ ക്രമീകരണം നടത്തുന്നത് ഒരു നിശ്ചിത അളവ് സമയത്തിന് ദിവസം എന്നും, അതിന്റെ വിവിധ ഗുണിതങൾക്ക് ആഴ്ച, മാസം, വർഷം എന്നിങ്ങനെ പേരുകൾ നൽകിയുമാണ്. ജ്യോതിശാസ്ത്രമാണ് കലഗണനയുടെ ആധാരം എങ്കിലും കലണ്ടറിലെ കാലയളവുകൾ ചന്ദ്രൻ, സൂര്യൻ എന്നിവയുടെ ചലനവുമായി പൂർണമായും ഒത്തുപോവണമെന്നില്ല.

     പല സംസ്കാരങ്ങളും സമൂഹങ്ങളും മുമ്പുള്ളവ മാതൃകയാക്കി പുതിയ കലണ്ടറുകൾ നിർമിച്ചിട്ടുണ്ട്. ഓരോരുത്തരും തങ്ങളുടെ പ്രത്യേക ആവശ്യങ്ങൾക്കനുസരിച്ച് കലണ്ടറിൽ ആവശ്യമായ പരിഷ്കാരങ്ങൾ വരുത്തി.

   നിത്യജീവിതത്തിൽ എളുപ്പത്തിൽ ഉപയോഗപ്പെടുത്താനാകും വിധം കലണ്ടർ സം‌വിധാനം രേഖപ്പെടുത്തിവക്കുന്ന ഭൗതിക വസ്തുവിനേക്കൂടി കലണ്ടർ എന്നു പറയയാറുണ്ട്. ഈ വാക്കിന്റെ ഏറ്റവും വ്യാപകമായ ഉപയോഗം ഈ അർത്ഥത്തിലാണ്. ഇത് മിക്കവാറും കടലാസ് കൊണ്ടുള്ളതായിരിക്കും. കമ്പ്യൂട്ടർ‌വൽകൃത കലണ്ടറുകളും ഇന്നുണ്ട്. ചെയ്യാനുള്ള കാര്യങ്ങൾ കൃത്യ സമയത്ത് ഓർമപ്പെടുത്തുന്ന രീതിയിൽ ഇവയെ ക്രമീകരിക്കാം

 

   കണക്കുകൂട്ടുക എന്നർത്ഥം വരുന്ന കലൻഡേ എന്ന പദത്തിൽ നിന്നുമാണ് കലണ്ടർ എന്ന പദമുണ്ടായത്.ഭൂമിശാസ്ത്രപരവും കാലാവസ്ഥാസം‌ബന്ധിയുമായ പ്രതിഭാസങ്ങളായിരുന്നു ആദ്യകാല കലണ്ടർ സം‌വിധാനങ്ങൾക്ക് അടിസ്ഥാനം.നൈൽ നദിയിലെ വർഷം തോറുമുണ്ടാകുന്ന വെള്ളപ്പൊക്കത്തെ അടിസ്ഥാനമാക്കി പ്രാചീന ഈജിപ്തുകാർ ഒരു കലണ്ടറിനു രൂപം നൽകിയിരുന്നു. പിന്നീട് ആകാശഗോളങ്ങളെ അടിസ്ഥാനമാക്കിയുള്ള കലണ്ടർ മെസൊപൊട്ടേമിയ, പ്രാചീനഭാരതം തുടങ്ങിയ സ്ഥലങ്ങളിൽ രൂപപ്പെട്ടു വന്നു. ബി.സി45ൽ ഇന്നു കാണുന്ന കലണ്ടറിന്റെ ആദ്യരൂപമായ ജൂലിയൻ കലണ്ടർ നിലവിൽ വന്നു. സൂര്യന്റേയും ഭൂമിയുടേയും ചലനങ്ങളേക്കുറിച്ച് കൂടുതൽ വിവരങ്ങൾ ലഭ്യമായപ്പോൾ ജൂലിയൻ കലണ്ടറിന്റെ പ്രസക്തി നഷ്ടമാവുകയും 1582ൽ പോപ്പ് ഗ്രിഗറി പതിമൂന്നാമൻ ഗ്രിഗോറിയൻ കലണ്ടറുകൾക്ക് രൂപം നൽകുകയും ചെയ്തു.

 

ഗ്രിഗോറിയൻ കലണ്ടർ

ഇന്ന് ലോകവ്യാപകമായി ഉപയോഗിയ്ക്കുന്ന കലണ്ടർ സം‌വിധാനമാണ് ഗ്രിഗോറിയൻ കലണ്ടർ.യേശുക്രിസ്തു ജനിച്ച വർഷത്തെ അടിസ്ഥാനമാക്കിയാണ് ഇത് തയ്യാറാക്കിയിരിയ്ക്കുന്നത്.

മാസങ്ങൾ

• ജനുവരി

റോമൻ സാഹിത്യത്തിലെ ആരംഭങ്ങളുടെ ദൈവമായ ജാനസ് ലാനുയാരിയസ് എന്ന ദേവന്റെ പേരാണ് ഗ്രിഗോറിയൻ കലണ്ടറിലെ ആദ്യമാസമായ ജനുവരിയ്ക്ക് നൽകിയിരിയ്ക്കുന്നത്.

• ഫെബ്രുവരി

ലാറ്റിൻ ഭാഷയിൽ ശുദ്ധീകരണംഎന്നർത്ഥം വരുന്ന ഫെബ്രും എന്ന വാക്കിൽ നിന്നാണ് ഈ പേര് നൽകിയിരിയ്ക്കുന്നത്.

• മാർച്ച്

റോമാക്കാരുടെ യുദ്ധദേവനായിരുന്ന മാർസ്ഇൽ നിന്നാണ് ഈ പേര് വന്നത്.

• ഏപ്രിൽ

തുറക്കുക എന്നർത്ഥം വരുന്ന aperire എന്ന ലാറ്റിൻ പദത്തിൽ നിന്നുമാണ് ഈ പേര് വന്നത്.വസന്തത്തിന്റെ തുടക്കമാണ് ഇവിടെ ഉദ്ദേശിച്ചിരിയ്ക്കുന്നത്.

• മേയ്

ഗ്രീക്ക് ദേവതയായ മായിയയുടെ പേരാണ് ഈ മാസത്തിന് നൽകിയിരിയ്ക്കുന്നത്.

• ജൂൺ

ജൂപിറ്റർ ദേവന്റെ ഭാര്യയായി പുരാതന റോമക്കാർ കരുതിയിരുന്ന ജൂനോയിൽ നിന്നുമാണ് ജൂൺ എന്ന പേർ സ്വീകരിച്ചത്.

• ജൂലൈ

ക്വിന്റിലസ്എന്ന് ആദ്യം പേർ നൽകി. ശേഷം ജൂലിയസ് സീസർ ജനിച്ചത് ഈ മാസത്തിലായതിനാൽ ജുലൈ എന്ന് പുനർനാമകരണം ചെയ്തു.

• ഓഗസ്റ്റ്

പുരാതന റോമൻ കലണ്ടരിൽ ആറാമത്തെ മാസമായി കരുതിയിരുന്നതിനാൽ ആറാമത്എന്നർത്ഥം വരുന്ന സെക്റ്റിലിസ്എന്ന ലാറ്റിൻ വാക്കാണ് ആദ്യം ഉപയോഗിച്ചത്.പിന്നീട് അഗസ്റ്റസ് ചക്രവർത്തിയുടെ ബഹുമാനാർത്ഥം ഓഗസ്റ്റ് എന്ന പേര് നൽകി.

• സെപ്റ്റംബർ

ലാറ്റിൻ ഭാഷയിൽ ഏഴ് എന്ന് അർത്ഥം വരുന്ന സെപ്റ്റംഎന്ന പദം ആണ് പേരിനടിസ്ഥാനം.

• ഒക്ടോബർ

ലാറ്റിൻ ഭാഷയിൽ എട്ട് എന്നർത്ഥം വരുന്ന ഒക്റ്റോ എന്ന പദമാണ് പേരിനടിസ്ഥാനം

• നവംബർ

ഒൻപത് എന്നർത്ഥം വരുന്ന നോവംഎന്ന ലാറ്റിൻ പദത്തിൽ നിന്നുമാണ് ഈ പേര് സ്വീകരിച്ചത്.

• ഡിസംബർ

ലാറ്റിൻ ഭാഷയിൽ പത്ത് എന്നർത്ഥം വരുന്ന ഡിസം‌ബർ റോമൻ കലണ്ടറിൽ പത്താമത്തെ മാസമായിരുന്നു.

 

മലയാളം കലണ്ടർ

ചിങ്ങം മുതൽ കർക്കിടകം വരെ പന്ത്രണ്ട് മാസങ്ങളുള്ള ഒരു മലയാളം കലണ്ടർ കേരളത്തിൽ നിലവിലുണ്ട്. ചിങ്ങം, കന്നി, തുലാം, വൃശ്ചികം, ധനു, മകരം, കുംഭം, മീനം, മേടം, ഇടവം, മിഥുനം, കർക്കിടകം എന്നിവയാണു ഇതിലെ മാസങ്ങൾ. ഇതിനു കേരള സർക്കാറിന്റെ അംഗീകാരമുണ്ട്.

ഹിജറ വര്‍ഷ കലണ്ടര്‍

ക്രിസ്തുവര്‍ഷം 622 ല്‍ മുഹമ്മദ് നബി മക്കയില്‍ നിന്നും മദീനയിലേക്ക് യാത്ര നടത്തിയ വര്‍ഷം മുതലാണ് ചന്ദ്രമാസത്തെ ആധാരമാക്കിയ ഹിജറ വര്‍ഷ കലണ്ടര്‍ ആരംഭിക്കുന്നത്. മുഹറം   തൊട്ട് ദു-അല്‍ഹജ്ജ് വരെയുള്ള 12 മാസങ്ങളാണ് ഹിജറ വര്‍ഷ കലണ്ടറിലും ഉള്ളത്.

                                                                                                   കടപ്പാട് - വിക്കിപീഡിയ

ക്രിസ്തുമസ് ആശംസകള്‍

എല്ലാ അഭ്യുദയകാംഷികള്‍ക്കും സ്നേഹം നിറഞ്ഞ, നന്മയുടെ

 ക്രിസ്തുമസ് ആശംസകള്‍

ക്രിസ്തുമസ് ദിനാഘോഷം

       തിരുപ്പിറവിയുടെ ഓര്‍മകളുമായി ഒരു ക്രിസ്തുമസ് കൂടി വന്നെത്തി.

അത്യുന്നതങ്ങളില്‍ ദൈവത്തിന് മഹത്വം

ഭൂമിയില്‍ സന്മനസ്സുള്ളവര്‍ക്ക് സമാധാനം

     ലോകത്തിന്റെ സ്വന്തമായ ക്രിസ്തുമസ് പാണൂര്‍ സ്കൂളിലും വിപുലമായി ആഘോഷിച്ചു. ആശംസാ കാര്‍ഡ് നിര്‍മ്മാണം, ക്രിസ്തുമസ് സ്റ്റാര്‍ നിര്‍മ്മാണം, പുല്‍ക്കൂട് തയ്യാറാക്കല്‍, കരോള്‍ ഗാനാലാപനം, ക്രിസ്മ്സ് ഫ്രണ്ട്, ക്രിസ്തുമസ് കേക്ക് മുറിക്കല്‍ തുടങ്ങിയ പരിപാടികള്‍‌ നടത്തി. ശ്രീമതി ലളിത ടീച്ചര്‍ ക്രിസ്തുമസ് സന്ദേശം നല്‍കി. കുട്ടികള്‍ക്ക് നവ്യാനുഭവമായിരുന്നു ആഘോഷ പരിപാടികള്‍

 

 ക്രിസ്തുമസ് സ്റ്റാര്‍ നിര്‍മ്മാണം

 

                                                     ആശംസാ കാര്‍ഡ് നിര്‍മ്മാണം

 

പുല്‍ക്കൂട് തയ്യാറാക്കല്‍

 

ക്രിസ്തുമസ് ഫ്രണ്ടിനെ കാത്ത് . . .

 

കേക്ക് മുറി. . . .

 

സമ്മാനങ്ങള്‍ കൈമാറല്‍

 

നാടറിയാന്‍ . . .. 

മനുഷ്യാവകാശ ദിനം

         വിശ്വ മനുഷ്യാവകാശ പ്രഖാപനം (UDHR)1948 ഡിസംബർ 10നാണ് ഐക്യരാഷ്ട്രസഭ പ്രഖ്യാപിച്ചത്. ആ ദിനത്തിന്റെ ഓര്‍മ്മ പുതുക്കി എല്ലാ വര്‍ഷവും ഡിസംബര്‍ 10 ന് മനുഷ്യാവകാശ ദിനം ആഘോഷിക്കുന്നു.

എന്താണ് മനുഷ്യാവകാശം ?

   ഓരോവ്യക്തിക്കും അന്തസ്സും സുരക്ഷയും ഉറപ്പാക്കി സമൂഹത്തിൽ ജീവിക്കാനുള്ള അവകാശമാണിത്. സ്വകാര്യത, മതവിശ്വാസം, അഭിപ്രായ പ്രകടനം എന്നിവയ്ക്കുള്ള സംരക്ഷണം, ഭക്ഷണം വസ്ത്രം, പാര്‍പ്പിടം, എന്നിവയോടു കൂടിയ ജീവിതം നയിക്കാനുള്ള അവകാശം, വാർദ്ധക്യം, വൈധവ്യം, ശാരീരിക ബലഹീനതകൾ ഉൾപ്പെടെയുള്ള അവശത എന്നീ അവസ്ഥയിൽ ലഭിക്കേണ്ട സംരക്ഷണം, നിയമത്തിനുമുന്നിൽ ഉള്ള സംരക്ഷണം, കുറ്റവാളി എന്ന് തെളിയിക്കപ്പെടും വരെ നിരപരാധിയായി പരിഗണിക്കപ്പെടാനുള്ള അവകാശം, അന്യായമായിൽ തടങ്കലിൽ പാർപ്പിക്കില്ല എന്ന ഉറപ്പ് ഇവയെല്ലാം അന്താരാഷ്ട്ര തലത്തിൽ തന്നെ മനുഷ്യാവകാശങ്ങളായി പരിഗണിക്കപ്പെട്ടിരിക്കുന്നു.

  വിദ്യാലയത്തിലും മനുഷ്യാവകാശ ദിനം ആചരിച്ചു. സ്കൂള്‍ അസംബ്ലിയില്‍ മനുഷ്യാവകാശങ്ങളെക്കുറിച്ചും അവ ഇന്നത്തെ നിലയിലേക്ക് എത്തിയതെങ്ങനെയെന്നും കേരളീയ സാഹചര്യത്തില്‍ വിശദീകരിച്ചു.

ഭോപ്പാൽ ദുരന്തം

     യൂണിയന്‍ കാര്‍ബൈഡ് എന്ന അമേരിക്കന്‍ കമ്പനിയുടെ ഇന്ത്യയിലെ ആസ്ഥാനമായിരുന്നു, ഗുജറാത്തിലെ ഭോപ്പാല്‍. അവര്‍ കീടനാശിനി നിര്‍മ്മാണത്തിനായി ശേഖരിച്ച മീഥൈല്‍ ഐസോ സയനേറ്റ് എന്ന വിഷവാതകം അശ്രദ്ധ കാരണം 1984 ഡിസംബര്‍ 2 ന് രാത്രി അന്തരീക്ഷ വായുവില്‍ കലര്‍ന്നു. കാറ്റിന്റെ  ദിശയ്ക്കനുസരിച്ച് വാതകം ഭോപ്പാൽ നഗരത്തിലുടനീളം അലയടിക്കുകയും 16000 നും 30000 നും ഇടയിൽ ആൾക്കാർ കൊല്ലപ്പെടുകയും ചെയ്തു. 2 ലക്ഷത്തിൽപ്പരം ആൾക്കാരെ നിത്യരോഗികളാക്കിയ ഈ ദുരന്തം വിട്ടുമാറാത്ത ചുമ, കാഴ്ചതടസ്സം, കുട്ടികളിലെ തിമിരം, കാൻസർ, ക്ഷയം, തളർച്ച, വിഷാദം, പനി എന്നിവ ജീവിച്ചിരിക്കുന്നവർക്ക് നൽകി. ദുരന്തത്തിന്റെ പരിണിതഫലങ്ങൾ ഇപ്പോഴും അനുഭവിക്കുന്നു.  5 ലക്ഷത്തിലധികം മനുഷ്യരെ ബാധിച്ചു. ഔദ്യോഗിക കണക്കുകൾ പ്രകാരം ചോർച്ചയുണ്ടായ ഉടനെ 2,259 പേർ മരിച്ചു. രണ്ടാഴ്ചക്കകം 8,000-ൽ അധികം ആളുകൾ മരിച്ചതായി കണക്കാക്കപ്പെടുന്നു. ലോകത്തിലെ ഏറ്റവും ദാരുണമായ വ്യാവസായിക ദുരന്തമായി ഭോപ്പാൽ ദുരന്തം കണക്കാക്കപ്പെടുന്നു.

     യൂണിയൻ കാർബൈഡ് ഇന്ന് ഡൗ കെമിക്കൽസ് എന്ന പേരിൽ നിരവധി കീടനാശിനികൾ ഉത്പാദിപ്പിക്കുന്നു.

        ദിനാചരണത്തിന്റെ ഭാഗമായി ദുരന്തത്തില്‍ പൊലിഞ്ഞവരെ അുസ്മരിച്ച് മൗന പ്രാര്‍ത്ഥന നടത്തി. കീടനാശിനി രഹിത ലോകത്തിനായി ശ്രമിക്കാമെന്ന് പ്രതിജ്ഞയെടുത്തു.

ലോക എയ്ഡ്സ് ദിനം

            എല്ലാവർഷവും ഡിസംബർ ഒന്ന് ലോക എയ്ഡ്സ് ദിനമായി ആചരിക്കുന്നു. എയിഡ്സ് രോഗത്തോടുള്ള ചെറുത്ത് നിൽപ്പിനു ശക്തി കൂട്ടാൻ വേണ്ടി 1988 ഡിസംബർ ഒന്നുമുതലാണ്, ലോകാരോഗ്യ സംഘടന , ഐക്യ രാഷ്ട്ര സഭ എന്നിവയുടെ നേതൃത്വത്തിൽ ലോക എയിഡ്സ് ദിനം ആച്ചരിക്കപ്പെടുന്നത്.

            മനുഷ്യാവകാശങ്ങൾ സംരക്ഷിച്ചുകൊണ്ട്, എച്ച്.ഐ.വി നിയന്ത്രണം, അണുബാധിതർക്കുള്ള ചികിത്സ ,സംരക്ഷണം, പിന്തുണ എന്നിവ എല്ലാവർക്കും പ്രാപ്യമാക്കുക എന്നുള്ളതാണ് 2014 ലെ  സന്ദേശം .

          ദിനാചരണത്തിന്റെ ഭാഗമായി അസംബ്ലിയില്‍ എയിഡ്സ് രോഗം എന്താണെന്ന് വിശദീകരിച്ചു. ശരീരത്തിലെ പ്രതിരോധ സംവിധാനത്തിന്റെ പ്രവര്‍ത്തനങ്ങളെക്കുറിച്ചും വിശദീകരിച്ചു.

പഴശ്ശി ദിനം

കേരളത്തില്‍ ബ്രിട്ടീഷ് സാമ്രാജ്യത്തിനെതിരെ ആദ്യം യുദ്ധം പ്രഖ്യാപിച്ച നാട്ടു രാജാക്കാന്മാരിലൊരാളായിരുന്നു കേരളവർമ്മ പഴശ്ശിരാജാ. ബ്രിട്ടീഷുകാർക്കെതിരെ നടത്തിയ ചെറുത്തു നില്പുകൾ പരിഗണിച്ച് ഇദ്ദേഹത്തെ വീരകേരള സിംഹം എന്നാണ് ഇന്ത്യന്‍ സ്വാതന്ത്ര്യ സമര ചരിത്രങ്ങളില്‍ വിശേഷിപ്പിക്കുന്നത്. ബാലനായിരിക്കെ തന്നെ സ്വന്തം രാജ്യത്തെ സംരക്ഷിക്കാൻ പരദേവതയെ സാക്ഷിയാക്കി ദൃഢപ്രതിജ്ഞ ചെയ്ത പഴശ്ശിരാജാ തന്റെ വാക്ക്‌ അവസാന ശ്വാസംവരെ കാത്തു സൂക്ഷിച്ചുവെന്നാണ് ചരിത്രകാരന്മാർ രേഖപ്പെടുത്തുന്നത്.1805 നവംബർ 30ന് ആ വീര സിംഹം മാവിലത്തോട്ടിൻ തീരത്ത് വെടിയേറ്റു മരിച്ചു. അദ്ദേഹത്തിനായുള്ള സ്മാരകം കണ്ണൂര്‍ ജില്ലയിലെ പഴശ്ശി കോവിലകത്തിനു സമീപം നവംബര്‍ 30 ന് നാടിനു സമര്‍പ്പിച്ചു. ബ്രിട്ടീഷുകാര്‍ കൂര്‍ഗ് -തലശ്ശേരി സംസ്ഥാന പാതയുണ്ടാക്കിയത് പഴശ്ശി കോവിലകം ഇടിച്ചു നിരത്തിയാണ്. ആ ധീര യോദ്ധാവിനെ ഞങ്ങള്‍ സാദരം നമിക്കുന്നു.

പച്ചക്കറി വിളവെടുപ്പ്

പാണൂര്‍ ഗവ.എല്‍.പി.സ്കൂളിലെ പച്ചക്കറികളുടെ ആദ്യ വിളവെടുപ്പ് നവംബര്‍ 28 ന് നടന്നു. വിളവെടുത്ത വെണ്ടക്ക ഉപ്പേരിയും സാമ്പാറുമുണ്ടാക്കാന്‍ ഉപയോഗിച്ചു.

ശാസ്ത്ര മേള

      ഉപജില്ലാ ശാസ്ത്ര മേളയില്‍ ലഘുപരീക്ഷണത്തില്‍ ഒന്നാം സ്ഥാനം നേടിയ ദേവിക മധു, ശ്രീഹരി എന്നിവര്‍ക്കുള്ള സര്‍ട്ടിഫിക്കറ്റുകള്‍ സീനിയര്‍ അസിസ്റ്റന്റ് ശ്രീമതി ഇന്ദിര അസംബ്ലിയില്‍ വെച്ച് നല്‍കി.

അന്താരാഷ്ട്ര ശിശുദിനം

      കുട്ടികളുടെ അവകാശങ്ങള്‍ സംബന്ധിച്ച ഐക്യരാഷ്ട്രസഭയുടെ ഉടമ്പടി അംഗരാജ്യങ്ങള്‍ അംഗീകരിച്ച 1989 നവംബര്‍ 20 ന്റെ ഓര്‍മ്മപുതുക്കി  പാണൂര്‍ സ്കൂളിലും  ശിശുദിനം ആഘോഷിച്ചു. കുട്ടികളുടെ അവകാശങ്ങള്‍ സംബന്ധിച്ച പവര്‍പോയിന്റ് അവതരണം നടത്തി. അവകാശ ലംഘനങ്ങള്‍ പരിഹരിക്കപ്പെടേണ്ടതെങ്ങിനെയെന്നും വിശദീകരിച്ചു. കുട്ടികളുടെ കലാപരിപാടികളും നടന്നു.

ബാലോത്സവം

ഇന്ത്യയുടെ പ്രഥമ പ്രധാനമന്ത്രിയും കുട്ടികളുടെ ചാച്ചാജിയുമായ ജവഹര്‍ലാല്‍ നെഹ്റുവിന്റെ 125 ാം ജന്മദിനം വിദ്യാലയത്തില്‍ വിപുലമായി ആഘോ‍ഷിച്ചു. കുട്ടികളുടെ കലാ പരിപാടികള്‍, അനുസ്മരണം, ക്വിസ്സ് , പായസ വിതരണം തുടങ്ങിയവ നടന്നു.

രക്ഷാകര്‍തൃ സംഗമം

          സര്‍വ്വശിക്ഷാ അഭിയാന്റെ നിര്‍ദ്ദേശാനുസരണം ചേര്‍ന്ന  രക്ഷിതാക്കളുടെ സംഗമത്തില്‍ എങ്ങിനെ നല്ല രക്ഷിതാവാവാം, അവകാശാധിഷ്ഠിത വിദ്യാലയം, ശുചിത്വ വിദ്യാലയം, ശിശുസൗഹൃദ വിദ്യാലയം തുടങ്ങിയ മേഖലകള്‍ കേന്ദ്രീകരിച്ച് ചര്‍ച്ചകള്‍ നടന്നു. മികവാര്‍ന്ന വിദ്യാലയം സാക്ഷാത്കരിക്കാന്‍ എന്തെല്ലാം ചെയ്യണമെന്നും രക്ഷിതാക്കളുമായി സംവദിച്ചു. പി.ടി.എ പ്രസിഡണ്ട് ശ്രീ.എം ജയചന്ദ്രന്‍ ഉദ്ഘാടനം ചെയ്തു. ഹെഡ്മാസ്റ്റര്‍ ശ്രീ. ദാമോദരന്‍ മാസ്റ്റര്‍ സ്വാഗതമാശംസിച്ചു. ശ്രീ.സജിത്ത് കുമാര്‍, ശ്രീമതി ലളിത, ശ്രീമതി ഇന്ദിര എന്നിവര്‍ ക്ലാസ്സുകള്‍ നയിച്ചു.

സി.വി.രാമന്‍ ജന്മദിനം

     ഇരുപതാം നൂറ്റാണ്ടിലെ ലോകപ്രശസ്തരായ ഭാരതീയ ശാസ്ത്രജ്ഞരിൽ പ്രമുഖനാണ്‌ ചന്ദ്രശേഖര വെങ്കിട്ട രാമൻ അഥവാ സി.വി.രാമൻ. രാമന്‍ പ്രഭാവം എന്ന കണ്ടെത്തലിന്‌ 1930-ൽ ഭൗതികശാസ്ത്രത്തിലെ നോബല്‍ സമ്മാനത്തിന് അർഹനായി. ഫിസിക്സിൽ ആദ്യമായി നോബൽ സമ്മാനം നേടിയ ഏഷ്യക്കാരനാണ് സി.വി.രാമന്‍. വളരെ തുച്ഛമായ തുക മാത്രം ചെലവഴിച്ച് സ്വയം നിര്‍മ്മിച്ച ഉപകരണങ്ങള്‍ ഉപയോഗിച്ചാണ് അദ്ദേഹവും ശിഷ്യന്മാരും ഈ നേട്ടം കൈവരിച്ചത്. മികച്ച അധ്യാപകനായ സി.വി.രാമന്‍ തന്റെ ശിഷ്യന്മാര്‍ക്ക് യഥാര്‍ത്ഥ ഗുരുനാഥനായിരുന്നു. ഇന്ത്യയില്‍ ശാസ്ത്രഗവേഷണത്തിന് അടിത്തറയിട്ട അദ്ദേഹത്തിന്റെ പ്രവര്‍ത്തനങ്ങളുടെ മധുരഫലങ്ങളാണ് നാമിന്ന് അനുഭവിക്കുന്നത്.

 

 

          ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സില്‍ നിന്നു 1948-ൽ അദ്ദേഹം വിരമിച്ചു. അതിനു ശേഷം ബാംഗ്ലൂരിൽ അദ്ദേഹം  രാമന്‍ റിസര്‍ച്ച് ഇന്‍സ്റ്റിറ്റ്യൂട്ട് സ്ഥാപിച്ചു. മരിക്കുന്നതു വരെ അദ്ദേഹം അതിന്റെ ഡയറക്ടറായി പ്രവർത്തിച്ചു. 1954-ൽ അദ്ദേഹത്തിനു ഭാരതരത്ന പുരസ്കാരം ലഭിച്ചു^.  1970 നവംബർ 21 തന്റെ 82-മത്തെ വയസ്സിൽ സി .വി. രാമൻ മരണമടഞ്ഞു. നിശ്ചയിച്ചുറപ്പിച്ചപ്രകാരം രാമൻ റിസേർച്ച് ഇൻസ്റ്റിറ്റ്യൂട്ടിൽ അദ്ദേഹത്തിന്റെ മൃതശരീരം സംസ്കരിച്ചു. അദ്ദേഹത്തിന്റെ ആഗ്രഹപ്രകാരം യാതൊരുവിധത്തിലുള്ള മതപരമായ ചടങ്ങുകളും നടന്നില്ല. ശാസ്ത്രത്തിനായി ജീവിതം ഉഴിഞ്ഞുവെച്ച ആ മഹാ പ്രതിഭാശാലിക്ക് ഇനിയും ധാരാളം പിന്‍ഗാമികള്‍ ഉയര്‍ന്നു വരട്ടെ.

കേരളപ്പിറവി ദിനാഘോഷം

      കേരളത്തിന്റെ 57- ാമത്  പിറന്നാള്‍ വിവിധങ്ങളായ പരിപാടികളോടെ വിദ്യാലയത്തില്‍ ആഘോഷിച്ചു. അസംബ്ലിയില്‍ മലയാളഭാഷാ പ്രതി‍ജ്ഞ ചൊല്ലിക്കൊടുത്തു. തുടര്‍ന്ന് കേരളപ്രശ്നോത്തരി, കേരളഭാഷാ ഗാനാലാപന മത്സരം, കേരളത്തിലെ പ്രധാന സ്ഥലങ്ങളുടെ ചലന ദൃശ്യങ്ങളുടെ പ്രദര്‍ശനം തുടങ്ങിയവ നടത്തി.

വിജ്ഞാനോത്സവം

     2014 ഒക്ടോബര്‍ 19 ന് ഗവ.എല്‍.പി.സ്കൂള്‍ ഇരിയണ്ണിയില്‍ വെച്ച് നടന്ന മുളിയാര്‍ ഗ്രാമപഞ്ചായത്ത് തല യൂറീക്ക വിജ്ഞാനോത്സവത്തില്‍ പാണൂര്‍ ഗവ.എല്‍.പി.സ്കൂളിലെ ദേവിക മധു ഒന്നാമതെത്തി അഭിമാന താരയമായി. ദേവികക്ക് എല്ലാ വിധ അഭിനന്ദനങ്ങളും . വിജ്ഞാനോത്സവത്തില്‍ പങ്കെടുത്ത ശ്രീഹരി, കീര്‍ത്തന, ആരോമല്‍, ശിവനന്ദ എന്നിവരും മികച്ച പ്രകടനം നടത്തി.

Blog Inaguration

ബ്ലോഗ് ഉദ്ഘാടനം

ജില്ലാ വിദ്യാഭ്യാസ പരിശീലന കേന്ദ്രം ഐ.ടി അറ്റ് സ്കൂളുമായി ചേര്‍ന്ന് നടപ്പിലാക്കുന്ന കേരളത്തില്‍ തന്നെ ശ്രദ്ധിക്കപ്പെട്ട പ്രവര്‍ത്തനമായിരുന്നു ബ്ലെന്‍ഡ്. ജില്ലയിലെ എല്ലാ വിദ്യാലയങ്ങളെയും ബ്ലോഗ് എന്ന നവ സാമൂഹ്യ മാധ്യമത്തിലൂടെ  ബന്ധിപ്പിച്ചുകൊണ്ട് പരസ്പരം അറിയുക, മികവ് നേടുക എന്ന ലക്ഷ്യം കൈവരിക്കാനുള്ള തുടക്ക പ്രവര്‍ത്തനമായിരുന്നു ഇത്.  ബ്ലെന്‍ഡ് പരിശീലനം നേടിയ അധ്യാപകരുടെ നേതൃത്വത്തില്‍ എല്ലാ വിദ്യാലയങ്ങളും സ്വന്തമായി ബ്ലോഗ് നിര്‍മ്മിച്ചു കഴിഞ്ഞു. പാണൂര്‍ ഗവ.എല്‍.പി.സ്കൂള്‍ നിര്‍മ്മിച്ച  ബ്ലോഗിന്റെ ഉദ്ഘാടനം ബഹു. മുളിയാര്‍ ഗ്രാമപഞ്ചായത്ത് പ്രസിഡണ്ട് ശ്രീമതി വി.ഭവാനി നിര്‍വ്വഹിച്ചു. ചടങ്ങില്‍ മുളിയാര്‍ ഗ്രാമപഞ്ചായത്ത് വൈസ് പ്രസിഡണ്ട് ശ്രീ.എം.മാധവന്‍ അധ്യക്ഷത വഹിച്ചു. ഗ്രാമപഞ്ചായത്ത്  വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്സണ്‍, പി.ടി.എ ഭാരവാഹികള്‍ തുടങ്ങിയവര്‍ ആശംസ അര്‍പ്പിച്ച് സംസാരിച്ചു.

POSTAL DAY

തപാല്‍ ദിനങ്ങള്‍

       ലോക തപാല്‍ ദിനമായ ഒക്ടോബര്‍ 9, ദേശീയ തപാല്‍ ദിനമായ ഒക്ടോബര്‍ 10 എന്നീ ദിനാചരണങ്ങളുമായി ബന്ധപ്പെട്ട് കത്തെഴുത്ത് മത്സരം സംഘടിപ്പിച്ചു. കുട്ടികള്‍ ആവേശ പൂര്‍വ്വം മത്സരത്തില്‍ പങ്കെടുത്തു. പഴയതും പുതിയതുമായ വിവര വിനിമയ സംവിധാനങ്ങളെക്കുറിച്ച്  ലളിത ടീച്ചര്‍ അസംബ്ലിയില്‍ സംസാരിച്ചു.

നോബല്‍ സമ്മാനം

     ലോകത്തെ ഏറ്റവും ഉയർന്ന പുരസ്‌കാരമായി കരുതപ്പെടുന്ന ഒന്നാണ് നോബൽ സമ്മാനം.നോബൽ പതക്കത്തിനും ബഹുമതി പത്രത്തിനു പുറമേ 10 മില്ല്യൺ സ്വീഡൻ ക്രോണ (2006-ലെ കണക്കു പ്രകാരം ഏതാണ്ട് 6 കോടി 26 ലക്ഷം ഇന്ത്യന്‍ രൂപ ) സമ്മാനത്തുകയും ജേതാവിനു ലഭിക്കുന്നു.  

 

         ഭൗതിക ശാസ്ത്രം, രസതന്ത്രം, വൈദ്യശാസ്ത്രം, സമാധാനം, സാഹിത്യം, സാമ്പത്തിക ശാസ്ത്രം  എന്നീ മേഖലകളിൽ, ലോകത്ത്‌ മഹത്തായ സംഭാവനകൾ നൽകിയവർക്ക്‌ ലിംഗ, ജാതി, മത, രാഷ്‌ട്ര ഭേദമന്യേ നൽകുന്ന പുരസ്‌കാരമാണ്‌ നോബൽ സമ്മാനം. ഡൈനാമിറ്റ് എന്ന സുരക്ഷിതമായ സ്ഫോടക വസ്തു കണ്ടുപിടിച്ച സ്വീഡിഷ് രസതന്ത്രജ്ഞനായ ആല്‍ഫ്രഡ് നോബല്‍ ഏര്‍പ്പെടുത്തിയതാണ് നോബല്‍ സമ്മാനം. ലോകത്തില്‍ ഏറ്റവും കൂടുതല്‍ വിലമതിക്കുന്നതാണ് നോബല്‍ സമ്മാനം. ഇപ്രാവശ്യത്തെ സമാധാന നോബല്‍ പങ്കിട്ടത് വിദ്യാഭ്യാസ അവകാശത്തിനായി താലിബാന്‍ ഭരണകൂടവുമായി പൊരുതിയ മലാല യൂസഫും കുട്ടികളുടെ അവകാശങ്ങള്‍ക്കു വേണ്ടി ബച്പന്‍ ബചാവോ ആന്ദോളന്‍ എന്ന സംഘടന രൂപീകരിച്ച് പ്രവര്‍ത്തിക്കുന്ന കൈലാസ് സത്യാര്‍ത്ഥിയുമാണ്. കുട്ടികള്‍ക്കു വേണ്ടി പ്രവര്‍ത്തിക്കുന്നവര്‍ക്ക് ലഭിച്ച നോബല്‍ തിളക്കത്തില്‍ പാണൂര്‍ സ്കൂളിന്റെ അഭിനന്ദനങ്ങള്‍ ..

 

ഗാന്ധി ജയന്തി വാരാഘോഷം

          ഗാന്ധി ജയന്തി വാരാഘോഷം സമാപിച്ചു. ഒക്ടോബര്‍ 2 മുതല്‍ 10 വരെ നടന്ന ഗാന്ധി ജയന്തി വാരാഘോഷം സമാപിച്ചു. 

പരിസര ശുചീകരണം, ജൈവ - അജൈവ മാലിന്യ സംസ്കരണം, പൈപ്പ് കമ്പോസ്റ്റിംഗ് സ്ഥാപനം, ഗാന്ധി ക്വിസ്സ്, ദണ്ഡി യാത്ര- ഡോക്യു-ഡ്രാമ വീഡിയോ പ്രദര്‍ശനം, 

പതിപ്പ് തയ്യാറാക്കല്‍, ഗാന്ധി സൂക്ത ശേഖരണം, പച്ചക്കറി കൃഷി വ്യാപനം, ശുചിത്വ പ്രതിജ്ഞ തുടങ്ങിയ പരിപാടികള്‍ വാരാഘോഷത്തിന്റെ ഭാഗമായി നടത്തി.

ഗാന്ധിജയന്തി- സേവന ദിനം

 മഹാത്മാ ഗാന്ധി

       സ്വാതന്ത്ര്യ സമരനേതാവും ലോകത്തിന്റെ വഴികാട്ടിയുമായിരുന്ന നമ്മുടെ രാഷ്ട്രപിതാവിന്റെ ജന്മദിനം ഇന്ന്.  കേവലമൊരു രാഷ്ട്രീയ നേതാവെന്നതിനേക്കാൾ ദാർശനികനായും ഗാന്ധി ലോകമെമ്പാടും അറിയപ്പെടുന്നു.

    ഏറ്റവും കഠിനമായ പ്രതിസന്ധിഘട്ടങ്ങളിലും സത്യം, അഹിംസ എന്നീ മൂല്യങ്ങളിൽ അടിയുറച്ചു പ്രവർത്തിക്കുവാൻ അദ്ദേഹം ശ്രദ്ധിച്ചു.എല്ലാ വിധത്തിലും സ്വയാശ്രയത്വം പുലർത്തിയ ഒരു ആശ്രമം സ്ഥാപിച്ച് അവിടെ ലളിത ജീവിതം നയിച്ച് അദ്ദേഹം പൊതുപ്രവർത്തകർക്കു മാതൃകയായി. സ്വാശ്രയ ഭാരതം സ്വപ്നം ക​ണ്ടു. അദ്ദേഹത്തിന്റെ ജന്മദിനം  നാടെങ്ങും ശുചീകരണ പ്രവര്‍ത്തനങ്ങള്‍ നടത്തി നാം ആഘോഷിക്കുന്നു. അഹിംസാധിഷ്ഠിത സത്യാഗ്രഹം എന്ന ഗാന്ധിയൻ ആശയത്തോടുള്ള ബഹുമാനാർത്ഥം ഐക്യരാഷ്ട്ര സഭ ഒക്ടോബര്‍ 2 ലോക അഹിംസാ ദിനമായും ആഘോഷിക്കുന്നു.

    പാണൂര്‍ ഗവ.എല്‍.പി.സ്കൂളില്‍ ഗാന്ധിജയന്തി ഒരാഴ്ചക്കാലം നീണ്ടു നില്‍ക്കുന്ന പ്രവര്‍ത്തനങ്ങളോടെയാണ് ആഘോഷിക്കുന്നത്. പരിസര ശുചീകരണം, പച്ചക്കറിത്തോട്ട നിര്‍മ്മാണം, ഗാന്ധി ക്വിസ്സ്, ഗാന്ധി സിനിമ പ്രദര്‍ശനം, ഫോട്ടോ പ്രദര്‍ശനം, ഗാന്ധി സൂക്ത ശേഖരണം തുടങ്ങിയ പ്രവര്‍ത്തനങ്ങള്‍ നടക്കും.

നവരാത്രി ആശംസകള്‍

തിന്മക്ക് മേല്‍ നന്മയുടെ വിജയവുമായി വീണ്ടുമൊരു നവരാത്രിക്കാലം  കൂടി ...

വിദ്യയുടെ വെളിച്ചത്തിലേക്ക് വീണ്ടും നമുക്ക് മിഴി തുറക്കാം.. . .

എല്ലാവര്‍ക്കും നവരാത്രി ആശംസകള്‍ !

 

ക്ലാസ്സ് തല പി.ടി.എ

       പാദവാര്‍ഷിക മൂല്യനിര്‍ണയപ്രവര്‍ത്തനങ്ങളുടെ തുടര്‍ച്ചയായുള്ള ക്ലാസ്സ് തല രക്ഷാകര്‍തൃസംഗമം വിദ്യാലയത്തില്‍ നടന്നു. കുട്ടികളുടെ പ്രകടനങ്ങള്‍, പോര്‍ട്ട് ഫോളിയോകള്‍, ഉത്തരക്കടലാസുകള്‍, സ്റ്റുഡന്റ് ഇവാല്വേഷന്‍ പ്രൊഫൈല്‍ തുടങ്ങിയവ പരിചയപ്പെട്ടു. 

            തുടര്‍ന്ന് എങ്ങനെ നല്ല രക്ഷാകര്‍ത്താവാവാം എന്നും കുട്ടികളെ മികവിലേക്ക് നയിക്കാന്‍ എന്തൊക്കെ ചെയ്യണമെന്നതിനെക്കുറിച്ചും ക്ലാസ്സ് നടത്തി. വിദ്യാലയത്തിലെ അധ്യാപകന്‍ ശ്രീ.സജിത്ത് കുമാര്‍ ക്ലാസ്സിന് നേതൃത്വം നല്‍കി. മംഗള്‍യാന്‍, അന്താരാഷ്ട്ര കുടുംബകൃഷി വര്‍ഷം എന്നിവയെക്കുറിച്ചും പ്രസന്റേഷന്റെ സഹായത്തോടെ പരിചയപ്പെടുത്തി.

മംഗള്‍യാന്‍

       മംഗള്‍യാന്റെ വിജയത്തിളക്കത്തില്‍ എല്ലാവരോടും ഒന്നിച്ച് അഭിമാനം പങ്കിടാന്‍ പാണൂര്‍ സ്കൂളും. മംഗള്‍യാനുമായി ബന്ധപ്പെട്ട ചിത്രങ്ങളും വീഡിയോ ദൃശ്യങ്ങളും കോര്‍ത്തിണക്കിയ പവ്ര‍ പോയിന്റ് പ്രസന്റേഷന്‍ അവതരണം സ്കൂളില്‍ നടന്നു. സൗരയൂഥത്തെക്കുറിച്ചും വിശേഷിച്ച് ചൊവ്വാ ഗ്രഹത്തെക്കുറിച്ചും ചര്‍ച്ച ചെയ്തു.