പഠനയാത്ര

വാതില്‍പ്പുറ പഠനത്തിന്റെ സാധ്യതകള്‍ തേടി പാണൂര്‍ സ്കൂളിലെ വിദ്യാര്‍ത്ഥികള്‍ ഏകദിന പഠനയാത്ര നടത്തി. മുറ്റത്തെ മുല്ലക്ക് മണമില്ലെന്ന പഴമൊഴി തിരുത്തിക്കൊണ്ട് നമ്മുടെ ജില്ലയിലെ വിവിധ സ്ഥലങ്ങളിലേക്കാണ് പഠനയാത്ര സംഘടിപ്പിച്ചത്. അനന്തപുരം ക്ഷേത്രം, സീതാംഗോളിയിലെ വ്യവസായ പാര്‍ക്കിലെ പ്രധാന വ്യവസായ ശാലകള്‍, കാസറഗോഡ് സാരീസ്, വിദ്യാ നഗര്‍ ഇന്‍ഡസ്ട്രിയല്‍ എസ്റ്റേറ്റ്, കാരവല്‍ ദിനപത്രം, നിത്യാനന്ദ കോട്ട, മാവുങ്കാലിലെ മില്‍മാ പ്ലാന്റ്, ആനന്ദാശ്രമം, ബേക്കല്‍ കോട്ട, പള്ളിക്കര ബീച്ച് തുടങ്ങിയ കേന്ദ്രങ്ങളിലൂടെയാണ് യാത്രാ സംഘം നീങ്ങിയത്.

വിജയോത്സവം

        

 

    നേട്ടങ്ങളുടെ തിളക്കത്തിലാണ് ഗവ എല്‍.പി. സ്കൂള്‍ പാണൂരിനെ സംബന്ധിച്ച് ഈ അധ്യയന വര്‍ഷവും കടന്നു പോകുന്നത്.  ഗ്രാമപഞ്ചായത്ത് തലത്തില്‍ നടത്തിയ യൂറീക്ക വിജ്ഞാനോത്സവത്തില്‍ ദേവിക മധുവിലൂടെ ഒന്നാം സ്ഥാനം നേടിക്കൊണ്ട് തുടക്കമിട്ട യാത്രയില്‍ ഉപജില്ലാ ശാസ്ത്രമേളയില്‍ എല്‍.പി. വിഭാഗത്തില്‍ രണ്ടാം സ്ഥാനം നേടാനായി. സ്കൂള്‍ കലോത്സവത്തിലും ജില്ലാ ശാസ്ത്രമേളയിലും നമ്മുടെ കുട്ടികള്‍ മികവ് തെളിയിച്ചു. ഈ വിദ്യാര്‍ത്ഥികളെ അനുമോദിക്കുക എന്ന ലക്ഷ്യത്തോടെയാണ്  ഫിബ്രവരി 26 ന് വിജയോത്സവം 2015 നടത്തിയത്. പി.ടി.എ പ്രസിഡണ്ട് ശ്രീ.എം.ജയചന്ദ്രന്റെ അധ്യക്ഷതയില്‍ ചേര്‍ന്ന സമ്മേളനത്തില്‍ മുളിയാര്‍ ഗ്രാമപഞ്ചായത്ത് വൈസ് പ്രസിഡണ്ട് ശ്രീഎം. മാധവന്‍ വിജയോത്സവത്തിന്റെ ഉദ്ഘാടനം നിര്‍വ്വഹിച്ചു. മികവ് തെളിയിച്ച എല്ലാ കുട്ടികള്‍ക്കും അദ്ദേഹം പുരസ്കാരങ്ങള്‍ വിതരണം ചെയ്തു. കാനത്തൂര്‍ യു.പി.സ്കൂളിന്റെ ജില്ലാ തലത്തില്‍ മികച്ച നാടകമായി തെരഞ്ഞെടുക്കപ്പെട്ട കോയി യിലെ പ്രാധാന കഥാപാത്രത്തെ അവതരിപ്പിച്ച പൂര്‍വ്വ വിദ്യാര്‍ത്ഥിയും മികച്ച നടനായി തെരഞ്ഞെടുക്കപ്പെടുകയും ചെയ്ത രാഹുല്‍ രവീന്ദ്രനേയും സമ്മേളനത്തോടനുബന്ധിച്ച് അനുമോദികകുകയുണ്ടായി.

  

         വിദ്യാലയത്തിലെ കുട്ടികളുടെ സര്‍ഗസൃഷ്ടികള്‍ ഉള്‍പ്പെടുത്തി തയ്യാറാക്കിയ നിറവ് ന്യൂസ് ലെറ്ററിന്റെ പ്രകാശനം ഉപജില്ലാ വിദ്യാഭ്യാസ ഓഫീസര്‍ നിര്‍വ്വഹിച്ചു. സര്‍വ്വശിക്ഷാ അഭിയാന്‍ ക്ലസ്റ്റര്‍ കോ-ഓഡിനേറ്റര്‍ ശ്രീമതി തുഷാര, എം.പി.ടി.എ പ്രസിഡണ്ട് ശ്രീമതി ശോഭ എന്നിവര്‍ ആശംസ അര്‍പ്പിച്ച് സംസാരിച്ചു. ഹെഡ്മാസ്റ്റര്‍ ശ്രീ.ദാമോദരന്‍ സ്വാഗതവും  സീനിയര്‍ അസിസ്റ്റന്റ് ശ്രതി ഇന്ദിര നന്ദിയും അറിയിച്ചു. വൈകുന്നേരം 4 മണിക്ക് വിജയോത്സവം സമാപിച്ചു.

മെട്രിക് മേള

       നാല് മെട്രിക് ദിനങ്ങള്‍ക്കു ശേഷം വിദ്യാലയത്തില്‍ മെട്രിക് മേള നടത്തി. ബാഡ്ജ് നിര്‍മ്മാണം, നിധി തേടല്‍, സമ്മാനം നേടല്‍, യാത്ര പോകാം, കടയിലേക്ക്, മുത്തശ്ശിയെ സഹായിക്കാം, ദാഹം തീര്‍ക്കാം, മുത്തു നല്‍കാം കടത്തു കടക്കാം, തുടങ്ങിയ പ്രവര്‍ത്തനങ്ങള്‍ക്കൊപ്പം വിവിധ വര്‍ക്കു ഷീറ്റുകളും പ്രയോജനപ്പെടുത്തി. ഊഹിക്കാനും അളക്കാനുമുള്ള ധാരാളം പ്രവര്‍ത്തനങ്ങളും ഉണ്ടായിരുന്നു. പ്രവര്‍ത്തനങ്ങള്‍ ഏറെ താല്പര്യത്തോടെ കുട്ടികള്‍ പൂര്‍ത്തിയാക്കി.
         കുട്ടികള്‍ തയ്യാറാക്കിയ ഉല്പന്നങ്ങളുടെ പ്രദര്‍ശനവും നടന്നു.

മെട്രിക് മേള- നീളം

         മെട്രിക് മേളയുടെ നാലാം ദിനത്തില്‍ നീളം പരിചയപ്പെട്ടു. കുട്ടികള്‍ക്ക് ഏറെ പരിചിതമായ അളവുകളിലൊന്നാണ് നീളം. വാട്ടര്‍ തീം പാര്‍ക്കിലെ ഉയരത്തിനനുസരിച്ച ടിക്കറ്റ് നിരക്കും ആരോഗ്യ കാര്‍ഡും സ്കെയില്‍ നിര്‍മ്മാണവും ചുറ്റളവും പത്രക്കടലാസും ഒക്കെ നീളം എന്ന യൂണിറ്റ് പരിചയപ്പെടന്നതിന് സഹായകരമായി. സ്കൂളില്‍ നിന്നും ഒരു കിലോമീറ്റര്‍ വരെയുള്ള അളവ് ഓരോ നൂറു മീറ്ററിലും അടയാളപ്പെടുത്തി മുന്നേറിയത് കുട്ടികള്‍ക്ക് നവ്യാനുഭവമായിരുന്നു. ഇതിലൂടെ ഒരു കിലോ മീറ്ററും ഒരു മീറ്ററും മില്ലീ മീറ്ററുകളും കുട്ടികള്‍ക്ക് പരിചയപ്പെടാനും ധാരണയുണ്ടാക്കാനും സാധിച്ചു.

              നാലു മെട്രിക് ദിനങ്ങള്‍ പൂര്‍ത്തിയായപ്പോള്‍ സമയം, ഭാരം, ഉള്ളളവ്, നീളം എന്നീ നാല് മെട്രിക് അളവുകളെക്കുറിച്ച് ഏകദേശ ധാരണ ഉണ്ടായിട്ടുണ്ട്.

മെട്രിക് മേള - ഭാരം

     മെ‍ട്രിക് മേളയുടെ മൂന്നാം ദിനത്തില്‍ ഭാരവുമായി ബന്ധപ്പെട്ട പ്രവര്‍ത്തനങ്ങളാണ് പൂര്‍ത്തിയായത്. അനുവിന്റെ പുറം വേദനയമായി ബന്ധപ്പെട്ട അനുഭവ പരിസരത്തിലൂടെ ഭാരം കണ്ടെത്തല്‍ പ്രവര്‍ത്തനങ്ങള്‍ നടത്തി. എല്ലാവരുടെയും സ്കൂള്‍ ബാഗിന്റെ ഭാരവും ശരീരഭാരവും കണ്ടെത്തി. തുടര്‍ന്ന് സ്കൂള്‍ ബാഗിലെ ഓരോ ഇനത്തിന്റേയും ഭാരം കണക്കാക്കി. വെയിംഗ് മെഷീനില്‍ തീരെ ചെറിയ ഭാരങ്ങള്‍ അളക്കാന്‍ കഴിയാത്തത് പ്രശ്നങ്ങള്‍ സൃ‍ഷ്ടിച്ചു. സധാരണ ത്രാസ് ഉപയോഗിച്ച് ഇത് പരിഹരിക്കാന്‍ ശ്രമിച്ചു. തുടര്‍ന്ന് എല്ലാ ഗ്രൂപ്പുകാരും  50 ഗ്രാം തൊട്ടുള്ള തൂക്കക്കട്ടികള്‍ സഞ്ചിയും കല്ലുകളും ഉപയോഗിച്ച് നിര്‍മ്മിച്ച് അടയാളപ്പെടുത്തി. ഭാരവുമായി ബന്ധപ്പെട്ട ഗണിത പസിലുകളും ഗ്രൂപ്പില്‍ പരിചയപ്പെട്ടു. ചെറിയ ഉളവുകള്‍- മില്ലി ഗ്രാം, പവന്‍ തുടങ്ങിയവയും പ്രായോഗികാനുവങ്ങളിലൂടെ പരിചയപ്പെട്ടു. ഗ്രൂപ്പില്‍ കളിത്രാസുകളും നിര്‍മ്മിച്ചു.

മെട്രിക് ദിനം - ഉള്ളളവ്

         മെട്രിക് ദിനങ്ങളുടെ രണ്ടാം  ഘട്ടം ഉള്ളളവ് സംബന്ധിച്ചായിരുന്നു. ഗംഗാനദിയെ ഭൂമിയിലേക്ക് കൊണ്ടു വന്ന കഥയിലൂടെ ജലത്തിന്റെ അമൂല്യതയും ജലം ജീവനാണെന്നും തിരിച്ചറിഞ്ഞു. ജീവനുള്ളവയുടെയെല്ലാം ഉള്ളില്‍ ജലമുണ്ട്. ഏറ്റവും കൂടുതല്‍ ജലമടങ്ങിയ ഇല ഏതായിരിക്കുമെന്ന് ചോദ്യമുന്നയിച്ചു. തുടര്‍ന്ന് എല്ലാവരും ഊഹം രേഖപ്പെടുത്തി. ഉത്തരം ഗ്രൂപ്പായി കണ്ടെത്താനുള്ള ശ്രമമായി. ഇലകള്‍ പിഴിഞ്ഞ് നീരെടുക്കാമെന്ന് ബോധ്യപ്പെട്ടു. അത് എങ്ങനെ അളക്കാം എന്നതായിരുന്നു അടുത്ത പ്രശ്നം. 

            എല്ലാ കുട്ടികളും വിവിധ വലുപ്പത്തിലുള്ള കുപ്പികളും മരുന്ന് പാത്രങ്ങളും അവയുടെ അളവ് ഡപ്പികളും കൊണ്ടു വന്നിരുന്നു. പരീക്ഷണത്തിലൂടെ ചെറിയ അളവ് - മില്ലി ലിറ്റര്‍ പരിചയപ്പെട്ടു. സ്കൂള്‍ പറമ്പിലെ ഇലകളില്‍ കോവലിലാണ് കൂടുതല്‍ ജലാംശമുള്ളതെന്ന് കണ്ടെത്തി. തുടര്‍ന്ന് വലിയ  അളവുകളും പരിചയപ്പെട്ടു. 

                  വിവിധ അളവ് പാത്രങ്ങളുടെ നിര്‍മ്മാണമാണ് ഗ്രൂപ്പില്‍ തുടര്‍ന്ന് നടന്നത്. തുര്‍ന്ന് പൊതുവായി ഊഹം രേഖപ്പെടുത്താനും അതിന് ശേഷം മത്സരമായി 8 വ്യത്യസ്ത അളവ് ഊഹിച്ച് രേഖപ്പെടുത്താനും അവസരമൊരുക്കി. മിക്ക കുട്ടികള്‍ക്കും ഏതാണ്ട് ശരിയായി ഊഹിക്കാന്‍ കഴിഞ്ഞുവെന്നത് പ്രവര്‍ത്തനത്തിന്റെ വിജമായ കണക്കാക്കാം. 

               തുടര്‍ന്ന് ആവേശകരമായ കുപ്പിയില്‍ വെള്ളം നിറയ്ക്കല്‍ മത്സരം നടന്നു. ജല സംരംക്ഷണത്തിന്റെ ആവശ്യകതയും അതിലൂടെ ചര്‍ച്ച ചെയ്തു. രാവിലെ ആരംഭിച്ച പ്രവര്‍ത്തനങ്ങള്‍ വൈകുന്നേരം 4.15 വരെ നീണ്ടു.       

                                         
  

   

മെട്രിക് മേള

     ഗണിത പഠനം മിവുറ്റതാക്കുക എന്ന ലക്ഷ്യത്തോടെ നടപ്പിലാക്കുന്ന മെട്രിക് മേളയുടെ ഭാഗമായുള്ള മെട്രിക് ദിനങ്ങള്‍ക്ക് വിദ്യാലയത്തില്‍ തുടക്കമായി. ആഴ്ചപ്പാട്ടോടെ ആരംഭിച്ച മെട്രിക് ദിനത്തില്‍ സമയം പരിചയപ്പെടുത്തി. സെക്കന്റുകള്‍, മിനിറ്റുകള്‍, മണിക്കൂറുകള്‍, ദിവസങ്ങള്‍, മാസങ്ങള്‍, വര്‍ഷങ്ങള്‍ എന്നിവ സവിസ്തരം ചര്‍ച്ച ചെയ്തു. ദിനത്തിന്റെ ഭാഗമായി നിര്‍മ്മാണങ്ങള്‍, പസിലുകള്‍ കണ്ടെത്താനും  പ്രശ്നോത്തരികള്‍, പ്രയോഗിക പ്രശ്നങ്ങള്‍ തുടങ്ങിയവയുടെ കുരുക്കഴിക്കാനും കുട്ടികള്‍ക്ക് കഴിഞ്ഞു. ക്ലോക്ക്, മെട്രിക് ക്ലോക്ക് എന്നിവ ഗ്രൂപ്പില്‍ നിര്‍മ്മിക്കുകയും അവ ഉപയോഗിച്ച് പ്രായോഗിക പ്രശ്നങ്ങള്‍ അവതരിപ്പിക്കുകയും ഉത്തരം കണ്ടെത്തുകയും ചെയ്തു. പിറന്നാള്‍ മരം തയ്യാറാക്കിയതോടെ ആദ്യ ദിന പ്രവര്‍ത്തനങ്ങള്‍ക്ക് വിരാമമായി.